قسم بالله العظيم شهادتى على ماحدث امام المنطقة الشمالية

وعشته لحظه بلحظه

by ZmoRoda ZaDa on Monday, 27 August 2012 at 12:54 ·
كنت زيي غيرى كتير سمعت عن الدعوة ليوم 24 اغسطس من تويتر وفيس بوك وقررت انى اشارك انا مش تابعة لاى حزب او حركة كنت نازلة مع نفسى وبس عاوزة اشارك اقول واعلن رفضى لجماعة الاخوان المشبوهه ومرشدهم وتدخلهم فى حخكم بلدى بدون استحياء

**بعد صلاة الجمعة خرجت زى كتير اوى غيرى توجهت للمنطقة الشمالية وجدت عدد مش بطال كنا حوالى 500 فرد العدد احزننى جدا لقلته بس قلت دى بداية مش مهم  ماكناش تابعين لاى جماعة او حزب كل واحد وواحدة فينا نازل يعبر عن رأيه وموقفه
اليوم كان جميل جدا خصوصا لما لاقيت ناس رافضه كتير زيي عددنا مش كبير ومانعرفش بعض بس متفقين على مبدا اننا بنحب البلد دى وعاوزنها احسن ورافضين الخونة والعملاء اللى قتلو جنودنا فى سينا وبيحاولو يشوهو مصريتنا ويكتمو صوتنا 
 عند اذان المغرب لاحظنا ان فى تاكسى وقف نزل واحد منه قعد يضرب نار فى الهوى سمعت صريخ وان واحد اتجرح جريو بيه على مستشفى القوات المسلحة زى ماعرفت منهم بعد كدا رفضو استقبالو بعدها  ناس  طلعو علينامن قهوة سيدى جابر مجموعة من الملتحين ماسكين سيوف وشوم كبيرة كان معاهم مجموعة شباب لابسين بنطلونات بس وصدرهم عارى وشكلهم يخوف فعلا 
جريو علينا وفضلو يقولو الله واكبر ياكفرة وضرب فينا بدون تفريق بين شاب او بنت او ست كبيرة او اطفال ضرب  بكل قوة وعنف  بقينا نجرى فى كل اتجاه دخلت انا ومجموعة بنات الجامع نحتمى بيه اقسم بالله العظيم دخلو ورانا شدونا من حجابنا ومن شعورنا طلعونا وبقو يضربو فى البنات 

البلطجية اللى كانو مع الملتحين كانو بيتحرشو ويشتمو البنات باقذر واوسخ الالفاظ 
الموضوع كان تكسير نفسية للبنات محاولة اهانة وتحطيم لينا زى ماتكون رسالة بيحرمونا ننزل تانى

 جرينا على العساكر اللى عند المنطقة الشماليه كنا هنبوس ايدهم واحنا بنقولهم افتحو الحاجز الحديد دخلونا احمونا احنا بنات وهما بيضربونا هيموتونا اقسم برب العزة رفضو قالولنا ماعندناش اوامر بالتدخل
طلبنا النجدة قالولنا مالناش دعوة  
اتعور ناس كتير انا مابقتش شايفه الا اصابات ودم فى وشوش الناس اللى كانت معايا حاولت اصور واحد ملتحى كان ماسك شومه وعمال يضرب فى البنات اسمه الشيخ حسن عرفت اسمه من اللى معاه كانو عمالين يقولو الله ينور ياشيخ حسن اضرب الكفرة اللى عاوزين يخربو البلد لمحنى وانا بصور قالهم هاتو بنت (........) دى جريو ورايا ضربنى على ايدى بالشومة اللى معاه الموبايل وقع واخده  جريت انا واكتر من واحدة كانو معايا 
طلعنا على اول شارع المشير من نحية البحر كلنا كنا مرمين على الرصيف متعورين ومضروبين ومتبهدلين 
الشباب كان غاضب كنا قعدو فى وسط الطريق وقفو العربيات كانو بيقول حاجة واحد هو احنا مش مصريين بلاش مصريين مش بنى ادميين عشان يتعمل فينا كدا ليه نتهان ونتضرب ونتبهدل كنا احنا نزلنا نقول رأينا بتحضر 
كان جزأنا الضرب والاهانه والبهدلة 
كانو عمالين يدعو على الاخوان والمرشد مرسى كانو محروقين اوى ومقهورين
رغــــــــــــم كل اللى حصلنا بس كلنا مصممين مش هنسيب حقنا ومش هنسكت و هننزل تانى وتالت مش هيقدور يخرسو صوتنا
معايا ناس كتير شباب عندهم استعداد يروحو اى حتة يحكة اللى حصل وناس مصورة كتير 

3419 دة رقم العربية خبطت 10 من المتظاهرين فى اسكندرية شاهين حمرا